《基本法》長伴魯平骨灰龕

【明報專訊】全國港澳研究會會長陳佐洱喺《紫荊雜誌》撰文，緬懷國務院港澳辦前主任魯平（小圖）生前負責制定《基本法》時嘅點滴。陳佐洱話，魯平「生命最後一刻仍關注著一國兩制」，更透露魯平之子魯恭，喺父親位於北京八寶山嘅骨灰龕內放咗兩件陪伴物，其中一件係《基本法》。


魯平喺上年5月逝世。陳佐洱喺文中透露，1990年4月4日跟隨魯平去到人民大會堂萬人大禮堂2樓，觀摩全體人大代表審議表決通過香港基本法草案。當主席團宣布香港基本法以壓倒性多數贊成票通過時，「魯平激動地從座位上站起來，使勁鼓掌，兩行晶瑩的淚水從眼鏡片下方掛下來。這是我第一次、也是最後一次看見他落淚」。


陳佐洱又透露魯平喺香港回歸後迷上電腦，仲會每日喺電腦前坐幾個鐘收發電郵，關注天下大事同港澳動態。