阿里旅行 飛鳥變飛豬

【明報專訊】小米創始人雷軍一句「站在風口上，豬也能飛」風靡內地，成為無數幻想飛上青天年輕人嘅至理名言。阿里巴巴旗下旅行品牌「阿里旅行」呢排改頭換面，改名「飛豬」，英文名Fliggy，主打出境旅遊產品，發布會甚至遠上北極圈的芬蘭聖誕老人村，相當花本。


阿里旅行呢個名，又真係有啲薯嘜，但改為飛豬，唔知典故嘅看官都需要有豐富的聯想力，先能將佢同旅行網站聯繫。話說，原始版Logo（標誌）原本不是豬，係一隻飛鳥，但阿里覺得鳥原本就會飛，太無特點，就變咗豬喇。睇番阿里巴巴旗下啲業務名，除咗天貓、螞蟻、菜鳥、閒魚（賣閒置嘅平台），又來一個飛豬，成個動物園咁。


阿里話，飛豬目前會員數目超過2億，日均訪問用戶則達1000 萬，又進軍海外，同支付寶雙劍合璧行天下，都唔少得香港㗎。各位準備好做一隻豬未？


[小琴密語]