胡官記招 梁粉「路過」出席

【明報專訊】退休法官胡國興噚日喺灣仔溫莎公爵社會服務大廈舉行記者會宣布參選特首，胡官並無邀請其他人嚟為佢站台。不過，就有「梁粉」聲稱路過而出席記者會，話係嚟「觀察」吓。


記者會開始前有兩個明顯唔係記者嘅男女入場，但佢哋完全唔肯透露身分，非常神秘。嗰位女士話自己唔認識胡官，出席亦唔代表係支持，只係純粹嚟「觀察」。


「相信胡官唔會認為刺探軍情」

神秘男女後來畀人發現，原來分別係金銀業貿易場監事長張德熙嘅太太張伍翠瑤，同埋大律師何京文。張伍翠瑤喺上屆特首選舉中，係梁振英競選團隊嘅一員。張太話，出席記者會係想聽多啲唔同諗法，強調係以個人身分出席。至於家係咪仲支持特首梁振英？張太接受傳媒訪問時就話覺得CY幾好，自己仲支持CY，亦相信胡官唔會認為佢係嚟刺探軍情。