示威後歎茶 一張改圖惹爭執 正義聯盟酒樓火併「全球熊貓會」

【明報專訊】幾個親建制團體噚日朝早去立法會外示威，高呼「反辱華、反港獨」，喺立法會休會後，示威者好快就散晒。去到晏晝，Emily喺灣仔富臨酒家見到有兩派示威者，筵開10圍歎茶，當中著住正義聯盟衫嘅愛港之聲主席高達斌就話係成員夾錢食飯，「無話邊個請邊個」。同場嘅仲有由正義聯盟分拆出嚟、同李偲嫣關係密切嘅「全球熊貓會」。惟飲茶途中雙方突然口角，搞到要警察到場調停。


Emily喺現場見到，唔少人仲著緊印有國旗嘅衫，現場亦有擺放朝早啲示威物品。


警員調停收場

正義聯盟鬧雙胞胎嘅事早前鬧得沸沸騰騰，估唔到飲飲吓茶，兩批人嘈起上嚟。事緣有正義聯盟嘅人喺酒樓擺放咗一張曾任李偲嫣選舉經理、「全球熊貓會」唐因嘅改圖海報，仲大大隻字寫住「小心老千」，引起同場嘅「全球熊貓會」成員不滿，雙方繼而口角，最終需警員到場調停。高達斌解釋，係與早前涉及李偲嫣嘅內部爭議有關，但強調海報所寫嘅係事實，唔怕畀人告咁話。