敗選黃容根 每票3100蚊 選舉捐贈 林依麗收超市券

【明報專訊】立法會選舉候選人開支陸續公布，通常功能組別議席因為選民人數唔多，所以選舉開支相對較少。不過，喺漁農界落敗嘅黃容根就使咗唔少錢，平均每張得票要3100元。


根據選舉開支申報，黃容根一共用咗約11.1萬元，但亦同時收到來自3人、一共11萬蚊嘅選舉捐贈，換言之，黃容根唔需要自己貼好多錢。佢主要嘅開支用喺租金、辦公室同運輸方面，用咗差唔多5萬元，其次用喺聘請選舉助理，花咗約4萬元。黃容根最終取得35票，輸畀取得98票嘅何俊賢，即係容根平均一票要3100蚊。


姚松炎花28.5萬 每票值114蚊

另一個功能組別議員、「建築、測量、都市規劃及園境界」姚松炎都用咗28.5萬元，佢一共取得2491票，平均每票值114蚊。姚松炎用咗近12萬元喺選舉廣告方面，選舉期間佢收到約4.4萬元選舉捐贈。


地區地選方面，出戰九龍西嘅林依麗名單就用咗5.2萬元，收咗7300蚊選舉捐贈，當中包括超級市場購物禮券。林依麗名單有634票，平均一票要82蚊。


喺新界西出選嘅鄺官穩就用咗12萬元打選戰，其中花近7.5萬賣廣告，得票810，平均每票148元，而佢就收到大約7.45萬元選舉捐贈。