委員會選主席「後遺症」 打完人海戰 毛孟靜率先退會

【明報專訊】立法會建制與非建制派早前就委員會選主席全面「開戰」，「冧人」加入，搞到大部分委員會都有超過60名委員，大戰過後有「後遺症」，開會嘅法定人數提高到20幾人咁多，坐唔齊人，分分鐘好易流會。大部分議員都加入咗十幾個委員會，個個叫苦連天，而打響退會潮嘅就係公民黨毛孟靜（Miss Mo），噚日環境事務委員會首次開會，佢就已去信要求退會。


無通知黨友引來不滿

立法會有18個事務委員會，Miss Mo噚日率先以「議會工作有所調整」為理由去信秘書處，要求退出環境事務委員會。Miss Mo話，之前已經講明係「冧人」搶位，無謂繼續留喺會度咁癲，又指自己只打算參加8個委員會左右。不過Miss Mo今次繼續我行我素，無同黨友共同進退。Emily聽聞佢退出前無通知過黨友，引嚟有啲不滿。


環境局長黃錦星同副局長陸恭蕙噚日都好畀面，一齊出席環境事務委員會。為免第一次開會就流會，建制同非建制都好乖，一開會已有20幾人坐齊，不過完會時就所剩無幾喇。唔少人預計，等議會工作變得繁重之後，就會有「退會潮」。