由300到3000人 曹星如：打拳找到認同

【明報專訊】香港首位全職西洋拳拳手曹星如（Rex，圖）早前創出20連勝佳績，好多港人都為佢興奮，Rex最近接受馬會刊物《駿步人生》訪問，透露拳擊令佢搵到方向同認同。


29歲嘅Rex話，讀書時嘅佢好無方向感，好早出嚟做嘢，直至17、18歲時拳擊教練邀請佢做拳館助教，但當時英文差到連基本溝通都唔得，令佢覺得要做好自己。佢之後轉做業餘運動員，24歲轉為全職，起步算好遲，所以佢為追回差距，付出更多時間同努力去訓練，成為全職運動員後，每日更用4至6小時操練。


Rex又形容拳擊令佢有認同感，因為細個讀書唔叻，出嚟做嘢又無專長或技能，連自己都唔認同自己，直至專注打拳，打出一定成績，存在感先慢慢建立。


佢話做咗全職運動員後，第一場比賽用咗3個月訓練，短時間內令佢發現原來自己能力嘅界線可以去到咁高，只要咬緊牙關，就有咁大轉變。佢又話打拳前無乜人識，自己第一次比賽時得300人入場，到最近就有成3000人入場，令佢好感動。