葛珮帆粉絲 萬like撐繼續流會

【明報專訊】立法會呢排都好熱鬧，連建制派都玩埋拉隊離場流會。立場鮮明嘅民建聯葛珮帆（EQ）前日就喺facebook留言問大家，係咪支持繼續流會，結果反應前所未有咁激烈，個帖出咗約24粒鐘，截至噚晚10點，已經有約1.1萬like表示支持，而留低嬲符號就有百幾人。EQ話佢唔係想為流會搞網上公投，只係想了解一下支持者嘅諗法。


EQ話，佢嘅fb平日留言，頂多會有3000個like，但今次一出post就「群情激烈」。佢個帖留言係「請問大家，為阻止侮辱中國人及攪（搞）港獨的人宣誓，若別無他法，是否支持繼續流會？」佢叫支持就畀like佢。


EQ話睇咗所有留言，大多數係支持建制派採取行動，當然都有人批評建制派搞流會喇。佢話從反應上嚟睇，佢嘅支持者對於青年新政議員宣誓時言論辱華，仍然好嬲，至於建制派係咪應該繼續搞流會，EQ話睇吓立法會主席有無方法處理先啦。