劉國勳約吳克儉 促收回生涯規劃論

【明報專訊】教育局長吳克儉早前提到大學生自殺原因時，話生涯規劃好重要，言論引起社會質疑，不時狙擊吳克儉嘅民建聯立法會議員劉國勳，就要求局長收回有關言論。劉國勳噚日喺facebook話，上星期見到吳克儉時當面要求佢收回言論，但對方支吾以對，噚日想搵佢認真傾吓，又發現佢去咗上海訪問，唯有白紙黑字寫信約對方會面，要求佢收回言論，並就問題展開討論。


劉國勳仲用hashtag寫「唔得掂」、「走唔甩」等，似乎吳克儉都難以輕輕甩身喎。


香港輔導教師協會噚日就出聲明，話有人認為生涯規劃逼年輕人自殺，有人就怪罪生涯規劃只係口號、反而限制咗年輕人嘅出路同選擇；佢哋覺得呢啲論述，都係源於唔少人對生涯規劃教育扭曲同片面嘅理解，甚至與生涯規劃嘅原意背道而馳，對此表示極度關注。