日研監管Pokémon GO 防課金洗錢？

【明報專訊】Pokémon GO嘅熱潮雖然已減退，不過佢帶來嘅威力實在強大，令到日本金融廳都要研究係咪要監管隻game。點解又關金融廳事？其實矛頭係遊戲入面嘅金幣。


《金融時報》報道，日本金融廳研究緊，手機遊戲入面玩家所領取嘅金幣，係咪屬於預付機制。如果被定義為預付機制，而開發商Niantic發出而又未用嘅金幣，等值超過1000萬日圓嘅話，咁Niantic就要喺銀行存放相當於一半嘅現金，作為擔保。


研遊戲金幣是否預付機制

睇番Pokémon GO，香港玩家可用8蚊換100個金幣，100個金幣可以買20個紅色精靈球或者1隻幸運蛋。嗱，講明先，小琴作為資深訓練員，從來無課金，每個金幣都係打道館賺返嚟！話說回來，日本金融廳嘅條例原意係防止有人利用虛擬貨幣洗黑錢，唔通政府覺得有人會透過大量購買精靈球去洗黑錢？


email: piano@mingpao.com

[小琴密語]