新濠影匯周年 優惠吸客

【明報專訊】新濠國際（0200）的博彩公司新濠博亞，旗下新濠影匯（圖）原來不經不覺開業一周年。據佢地講，原來影匯之名並非得個名咁簡單，真係畀人用嚟拍過電視節目同5部電影，仲要搞過27個演唱會同活動。主席何猷龍同拍檔James Packer鍾意玩嘅4D蝙蝠俠夜神飛馳，都有超過60萬人玩過，但比起8字形摩天輪，啲遊客始終對幸運8字情有獨鍾，玩嘅人超過100萬人，多過玩4D飛行。


新濠影匯又借開業一周年為名，大搞住宿套票優惠，低價至1201蚊起訂入住套票，實行唔畀隔籬附近嘅威尼斯人同巴黎人近期搞嘅6折訂房噱頭搶晒風頭。睇來各大新開賭場絞盡腦汁搶客，起碼十一黃金周後唔旺財都旺吓丁先。


[小琴密語]