趁建制議員離席出動 鄭松泰倒轉國旗區旗 劉國勳函警促調查

【明報專訊】建制派噚日製造流會，非建制派陣營都有唔同反應，例如長毛梁國雄同朱凱廸等人就喺會場外追住建制唔放。不過熱血公民鄭松泰（泰博）就趁點人數期間，將建制派議員擺喺枱頭嘅小型國旗同區旗逐一掉轉倒插。


Ann姐「撥亂反正」 泰博轉頭又整過

離開咗會議廳嘅民建聯蔣麗芸（Ann姐），話喺電視直播見到泰博咁做，即刻扯火返入會議廳，逐一將國旗區旗「撥亂反正」，仲念念有詞鬧鄭松泰係唔係香港人，話泰博行為係偷竊。


點知Ann姐搞番好，泰博轉頭又去整過，結果Ann姐又返去同泰博嘈。事件終於驚動到立法會主席梁君彥，要求泰博即刻返回座位，最後梁君彥更以行為不檢為由，要求保安將泰博趕離場，但泰博就喺會議廳擾攘咗一輪，未走已經宣告夠鐘流會。


其實呢啲表達「愛國愛港」嘅道具，係由民建聯劉國勳準備，佢話希望畀大家認識「香港是中國一部分」。佢又強烈譴責泰博倒轉旗幟嘅做法，係違反《國旗法》同《區旗法》。到傍晚時分劉國勳更去信警務處，要求警方立即對泰博嘅行為作調查並檢控。