梁耀忠叫完流會嗌投票 兩委員會選主席一齊取消

【明報專訊】立法會18個委員會噚日舉行正、副主席選舉，不過無諗到都搞到立立亂。唔知係咪上次主持大會做咗「逃兵」嘅街工梁耀忠受刺激，噚日喺保安事務委員會，再次主持首次會議時，就借機要求秘書處釐清自己係「主席」定「主持」。


先要求釐清「主席」定「主持」

不過，因雙方爭論到過咗原定會議結束時間，大部分議員轉場舉行下一輪委員會選舉。連阿忠自己都話，因為「唔夠人，今日會議我宣布流會」。點知佢轉過頭又要求議員投票選保安事務委員會主席，唔記得咗自己講過流會，搞到民建聯陳克勤都大怒，要求梁耀忠睇片回帶。最後緊接喺同一會議室舉行嘅人力事務委員會被迫取消。


長毛讚「李慧琼都唔錯」

噚日各委員會選主席另一看點，就係社民連梁國雄（長毛）大玩提名程序「拉布」。喺政制事務委員會上，佢同羅冠聰一唱一和，一口氣接連提名多個建制派議員出任主席。長毛仲罕有讚「李慧琼都唔錯」，提名對方同商界議員廖長江對撼，搞到李慧琼都笑言「梁國雄好少讚我，不過我唔接受」。


雖然建制議員曾提出異議，質疑濫用提名程序，不過主持會議嘅涂謹申就夠清醒喇，強調議事規則無限定提名次數，自己亦唔會考慮議員提名其他人任主席嘅動機。