4新丁入圍十大議員 鄺神排11

【明報專訊】新一屆立法會上周正式開局，香港大學民意研究計劃公布十大立法會議員排名及評分，當中4個係議會新丁，包括朱凱廸、羅冠聰、游蕙禎及周浩鼎，再次證明政治有時係講印象嘅，如果選民支持，做咗半個月議員嘅新人都可獲高評分。


呢次調查分兩階段，先喺9月底做首輪抽樣，叫受訪者講出10個熟悉嘅議員名字，結果得出最多人認識嘅12名議員，再喺10月中做第二階段評分調查，要求受訪者以0至100分作個別評分，結果涂謹申得57.3分排首位，排第10嘅周浩鼎有36.7分。至於鄺俊宇雖然有53.8分，分數都算高，但因為認知率較低，只能排到第11位，真係一個感歎號。