誠哥「找數」 DSE生收$5000現金券

【明報專訊】李嘉誠基金會之前推出「善用錢」計劃，無條件派發5000蚊畀每一個元朗同離島區中學嘅應屆文憑試學生，噚日基金會就正式開始「找數」，第一日係向東華三院盧幹庭紀念中學同伯裘書院嘅文憑試同學派發現金券，同學仔可以拎現金券去中國銀行換取5000蚊現金。


收親筆心意卡 鄧同學好開心

除咗錢之外，所有同學仔仲會收到一張心意卡，內容係「親愛的×××同學：應試之年，一點鼓勵」，並附有誠哥簽名。大家嘅心意卡嘅字都係印刷出嚟，但有一名姓鄧嘅同學仔就零舍好彩，皆因佢張卡係由誠哥親筆寫嘅。鄧同學話佢簡直係「難以形容地開心」，諗住用呢5000蚊買多啲文憑試舊試題同練習。


伯裘書院校長黃頴東就話，多次提醒過班同學仔，收到呢筆資助唔應該亂使，佢建議同學仔都係用於同文憑試相關嘅地方，買參考資料、買學習工具或者報吓課程都好。基金會嚟緊至12月會陸續向呢兩區其他中學學生派發現金券，預計有超過5700個文憑試生受惠，出年5至7月就會評估第一階段實施情况，有機會會將計劃擴展去其他地區。