取消積金對冲 吳永嘉「出手」 首場動議 工聯商界先開火

【明報專訊】立會明首次動議辯論

立法會一開鑼，泛民建制就住宣誓、委員會正副主席點分配等，已火藥味甚濃，但講到民生議題，勞工界同商界同樣對立，就算建制內部都無情講。聽日立法會大會將舉行本屆首次動議辯論，工聯會黃國健提出有關促請政府盡快取消強積金對冲機制嘅動議，但議會新丁、工業界（第二）議員吳永嘉就提出修訂，玩魔術咁將原議案改到意思完全相反，變成大讚對冲「運作良好」。


話說黃國健嘅動議指出，強積金2000年實施以來，成效備受質疑，對冲機制為社會詬病；截至今年第一季已對冲咗逾292億元，嚴重蠶食打工仔女嘅血汗錢，並直接影響打工仔嘅退休保障，促請政府盡快取消對冲機制，並全面檢討強積金計劃，以確保僱員權益不受損害及加強保障他們嘅退休生活。


吳修訂字眼：機制「運作良好」

不過，吳永嘉就完全唔客氣，獻出入議會嘅第一次，喺原議案提出修訂時刪去強積金為社會詬病等字句，變成強積金對冲機制「運作良好」，又話工商界堅決反對取消，促政府確保營商環境等。


本身屬工商界嘅民建聯蔣麗芸，修訂保留黃國健動議中促請政府盡快取消強積金對冲一句，仲要求政府為退休保障安排作一定嘅財政承擔。民主黨尹兆堅、工黨張超雄、新民黨田北辰同無黨派劉小麗亦有提出修訂，相信辯論呢條動議時，勞工、商界一定拗到面紅耳熱。