有話說﹕細路哥都打假波？

【明報專訊】Mama一對囝囡都鍾意運動，每逢佢哋參加比賽或者學校運動會，Mama都會去捧場。如果佢哋拎獎，梗係開心啦；就算比賽輸咗，見到佢哋全力以赴，作為家長都會引以為傲。


不過Mama早排睇新聞，知道內地有一場令人震驚嘅足球賽呀！嗰場係11歲以下組別嘅比賽，賽果係25﹕2。出現咁懸殊嘅比分，唔係因為實力相差太遠，而係有一隊明益街坊，瘋狂擺烏龍，有六七球都係特登踢入自己一方嘅龍門，等對手得分。


其實落得場當然想爭勝㗎啦，有乜理由送分畀對方，搞到自己大敗㗎？Mama諗極都諗唔明，於是請教前香港足球先生、現任車路士足球學校技術總監山度士。佢都話呢件事出人意表，相信一班小朋友唔會主動夾埋咁樣做，「小球員輸波冇任何好處，不過當帶隊嘅大人同佢哋講，不如呢場輸多啲啦，小朋友又可能會照做」。至於大人點解要指示佢哋輸波，就要再調查先知喇。


山度士話，佢喺足球學校裏面，都好注重向小球員灌輸公平競賽嘅概念，「如果日日講，佢哋可能聽到麻木，我會每隔三至四堂講一次，等佢哋從小有個道德價值觀，落到場就要盡力同埋公平」。


盡力同公平，聽落好簡單，原來要做到都唔易㗎。山度士記得，當足球學校仲喺起步階段嗰陣，球隊未成熟，不時都會落後幾球，呢個時候小球員特別易放軟手腳，「佢哋唔係刻意，但一落後得多就冇晒心機，有波都唔去追，變相咪即係放水」。事後就要調整佢哋嘅心態，落後都要盡力，先係認真嘅態度。


除此之外，體育精神唔止係爭勝，仲要尊重對手，佢都會教一班小球員，場上被踢到時唔好係咁嗌，想球證罰對方；唔小心踢到人嗰陣，就講番句Sorry。冇無謂衝突，球賽先會精彩。


不過，有時單用把口去灌輸未必有效，適當嘅懲罰都好緊要。如果小球員屢次唔服從教練指示、冇控制好脾氣，教練絕對有權下場唔畀佢做正選，「呢啲情景見唔少，連趕走學生都試過，但亦有人因為被罰，失去正選位置，之後真正反省自己，態度改善咗好多」。