財爺遊紐約 曾祖父餐館變美容店

【明報專訊】財政司長曾俊華喺美國生活多年，佢近日趁外訪重遊成長舊地紐約，噚日就發表題為「紐約回憶」嘅網誌緬懷往事，形容喺外地生活嘅上一輩華裔移民，往往好念舊情同守望相助，鄉里、鄰里間情誼特別濃厚。財爺網誌不乏弦外之音，話香港人只要團結一致，多啲互相尊重同真誠聆聽，努力做到無分彼此，一定能夠產生更多正能量，為香港未來發展加油咁話。


早前被前財爺梁錦松交託「團結香港」重任嘅曾俊華，又形容香港現時社區同屋邨內嘅關係，或者不及以前嘅街坊街里，但相信香港人對香港嘅熱愛同歸屬感係有增無減。


財爺話，到訪當地唐人街時，見到自己認得嘅舊建築同店舖，半世紀前同親友嘅點滴往事就湧上心頭，「心情既複雜又奇妙」。財爺去咗唔同地方「打卡」，包括以前經常去嘅教堂，而曾祖父舊餐館嘅現址，已經變成一間美容店。


財爺亦分享年少喺紐約嘅打工史，話曾經喺小食糖果店做暑期工，負責冲製飲品，一星期有20至30美元人工，而當時連鎖快餐店嘅漢堡包都係賣大約兩毫子，所以呢份兼職嘅回報「算是相當不錯」。