愛「鼠戰中環」 林鄭下年或參賽 建制泛民合作拎尾二

【明報專訊】建制泛民通力合作，跨過重重障礙，完成共同目標……呢個場面喺立法會或者少見，但喺噚日舉行嘅年度慈善活動「鼠戰中環」，民主黨涂謹申（阿涂）除咗搵嚟公民黨楊岳橋同公專聯莫乃光做隊友，仲搵埋自由黨邵家輝（Peter），同傳媒組成8人隊參賽。佢哋配以1970年代格仔恤同爆炸頭假髮參加接力賽，結果平咗議員傳媒隊近年最佳成績：尾二。


Peter今年獲阿涂邀請第一次參加活動，原來Peter早前有腳患，家都未好番，但佢噚日都頂硬上跑咗段大直路，體育精神滿分。已經第5年參賽嘅阿涂著上鮮紅長褲參賽，講到建制泛民「合作」，佢都話善事其實無分建制唔建制嘅。


「鼠戰中環」今年第11年舉行，跑手穿梭中環商廈同街道，途中要越過路障。政務司長林鄭月娥致辭時話自己好鍾意呢項活動，又形容中環係香港獨一無二嘅地區，雖然係金融中心，但唔希望令人感覺只同賺錢有關，強調中環係有靈魂嘅地方，有唔少歷史建築。


林鄭話，噚日係自己最後一次以政務司長身分主禮呢項活動，笑言自己下年可能都會組隊參賽。如果成事，唔知司長到時會以咩身分參加呢？


「鼠戰中環」今年為支援精神健康工作組織「思健」籌到320萬元。