會展訪客破億 英國客獲贈足金模型

【明報專訊】灣仔會議展覽中心開業28年，形形色色嘅展覽大家都去過，原來會展嘅訪客人數噚日突破一億，會展仲送咗個驚喜畀第一億個訪客。


呢個訪客係專程嚟香港參加秋季電子產品展嘅英國買家Nicholas J McVeigh，佢噚日朝早一踏入會展，會展人員即刻上前歡迎同恭賀，會展管理公司董事總經理梅李玉霞仲親自送一個足金會展中心模型畀佢留念。


呢個買家話自己過去10年，年年都嚟香港參加呢個展覽，估唔到咁好彩做咗第一億個訪客，好驚喜咁話。梅李玉霞就話，過去28年有超過4.5萬項活動喺會展舉行，2015/16年度就有1100項，接待咗550萬訪客，唔單止協助企業締造商機，仲促進香港同海外合作、提升香港嘅國際形象。