內會首會議又圍主席台

【明報專訊】今屆立法會內務委員會噚日開第一個會，但開會唔到5分鐘已出現「亂局」，有人質疑點解會議室大門鎖咗，亦有議員提出要喺會議討論秘書長監誓權、主持主席選舉嘅議員權力等議程。第一次做內會主席嘅李慧琼最初話「有得畀你哋討論」，最後「一錘定音」話內會唔係合適討論場所，一眾非建制議員唔滿意裁決，再次包圍主席台。


開唔到5分鐘現擾攘

立法會秘書長陳維安話會盡快草擬一份書面回覆，又認為秘書處多年來為唔同意見提供獨立專業嘅意見，認為「唔適合喺公眾場合同各位辯論」。


內會噚日開會唔到5分鐘，長毛梁國雄就提出會議室4道門有最少3道被上鎖，會影響安全，質疑秘書處怕3個宣誓無效嘅議員硬闖，又有議員擔心影響消防條例。李慧琼唔想展開係咪符合消防條例嘅討論，話會指示秘書處再做專業檢視，最後民主黨黃碧雲同熱血公民鄭松泰去開番道門，事件擾攘20分鐘先叫告一段落。


唔畀討論日前風波惹抗議

民主黨許智峯同獨立劉小麗早排去信，要求討論宣誓同主席選舉風波，但呢項議程就安排咗去「AOB（其他事項）」。李慧琼喺開會初期，提過「一定有得畀你哋討論，但是否令大家滿意係另一件事」，但到咗呢個議程就話內會唔係合適場合。公民黨陳淑莊質疑裁決唔符合《內務守則》，其他非建制議員亦提出一輪質疑仍無效，主席維持原判兼宣布散會。