認黨內士氣低落 狄志遠﹕無人話要摺埋新思維

【明報專訊】立法會選舉早已塵埃落定，標榜中間路線嘅新思維戰績麻麻，以約1.3萬票敗選九龍西，有黨友更退黨參選新界東。對於選舉接連失利，又經歷完退黨潮，新思維缺人缺錢之下，會唔會就咁解散？


主席狄志遠噚日喺傳媒茶敘承認，選舉之後內部一度士氣低落，有黨友認為成績唔理想，亦對政局失望，但係佢強調無人提出要退黨或者「摺埋」個黨。佢又話，新思維未來有兩大方向，包括加強論政，考慮鼓勵四五個年輕黨友落區，喺九龍西做好地區工作，希望可以凝聚內部力量，重新出發。


話走精英路線 唔再以選舉主導

早排新思維前成員邱勛宣布參選特首，狄志遠覺得好無奈，話新思維日後會偏向走精英路線，收黨員都會謹慎啲。


至於即將舉行選委會選戰，阿狄就耍手擰頭，話過去新思維已擺放太多精力喺選舉度，希望調整路線，唔再以選舉主導，只會畀黨友自由發揮。至於佢自己，就暫時積極考慮出戰社福界或教育界。