「靜宜」舞台劇亮相 「化身」禁煙助手

【明報專訊】靜宜喺日本動漫《叮噹》係大雄嘅夢中情人，嚟到香港嘅舞台，就變咗鋤強扶弱嘅朋友，幫手宣傳遠離煙仔。


香港吸煙與健康委員會每年都會以舞台劇方式，傳播無煙信息，委員會今年仲同中英劇團合作，寫咗《無煙聯盟》音樂劇，等學生可以一邊聽音樂、睇表演，一邊認識吸煙及二手煙禍害，當中仲會講時興嘅電子煙點樣影響身體。


音樂劇噚日舉行首演禮，故仔講述「無煙聯盟」主席路德，號召世界各地城市加入聯盟，但大型煙草集團主席擔心影響煙草生意，於是派出「臭煙十一人」狙擊路德，路德因為被打傷頭部失憶，流落到賣煙草賺錢嘅衛星小城，識咗居民程靜宜，最後喺靜宜幫助之下恢復記憶，最後合力令衛星小城加入聯盟。


套劇10月中會開始喺各區小學做近100場演出，詳情可以留意呢個網址：www.educationtheatre.hk。