齊著黑裙互讚靚 淑莊麗芸手拖手

【明報專訊】立法會開鑼，議員先要宣誓，無論男定女，唔少人都刻意執過吓、襯過衫先現身立法會，好似公民黨陳淑莊（Tanya）同民建聯蔣麗芸（Ann姐），噚日不約而同都著黑色連身裙現身，其中Ann姐著黑白色有旗袍領、仲有啲透視嘅裙，外加一件黑色西裝型外套；Tanya就著件黑色荷葉袖衫。Tanya同Ann姐雖然政見唔同，但一見到對方就互相大讚對方好靚，講得興起仲一度手拖手咁傾偈。


青年新政嘅游蕙禎噚日就著住件黑色中褸行入會議廳，但去到宣誓一刻，就除低件外套，以印上青政logo嘅T恤示人。部分女議員則以白色為主，新民黨容海恩就著白色外套，入面加條有藍、紅色圖案嘅絲巾配襯；工聯會麥美娟亦著一件白色長袖通花衫。


部分女議員則較鮮艷，新民黨葉劉淑儀著上一條印有海星等圖案嘅洋裝裙，外加一件鮮藍色外套；民建聯主席李慧琼就著白色裙，外面襯件粉紅色外套。