藍塘傲代理開拖 發展商﹕再犯罰停賽

【明報專訊】樓市無論市淡還是市旺，代理之間，或代理與發展商職員之間口角、甚至「開拖」間唔中就會發生。麗展（0488） 同郭老大郭炳湘合作嘅將軍澳藍塘傲開價後，示範單位所在嘅觀塘鱷魚恤大廈，噚日有代理同麗展工作人員，在大堂大打出手嘅衝突事件，秩序一度好混亂，仲被旁邊觀戰嘅花生友影埋片四圍發放，都咪話唔激。不過，麗展好厚道，冇公開涉事嘅代理行寶號，只話如相關公司再搞事就罰停賽。


麗展高級副總裁潘銳民噚日係事發後不久，回應小琴查詢時稱，代理之間競爭劇烈，與公司職員在言論上發生誤會，繼而發生肢體衝突，惟潘未有透露涉事代理行，只表示該公司有一定規模；咁究竟涉打架的代理係來自邊間行，大家就要估下了。到晚上，發展商發言人回應稱，麗展已向涉事代理行嘅主管級作口頭警告，涉打架的代理已被下令離場，強調若相關代理行再搞事，就考慮罰停賽。


地產代理監管局回覆本報稱，對接連發生懷疑代理打架事件感到失望，局方會了解及跟進事件，並轉介個案予警方調查，同時盡快約見涉事代理行管理層。


email: piano@mingpao.com

[小琴密語]