新舊議員齊玩直播 阿廸變「戰地記者」

【明報專訊】唔少議員都用facebook同網民、支持者交流，噚日新一屆立法會首日開會混亂一片，唔知議員係中間太得閒定係想搞直擊，無論建制派定非建制嘅議員，多次喺fb直播，等網民即時知道議會發生咩事。


新丁議員劉小麗噚日4次直播，除咗近距離直播非建制議員嘅抗爭外，經民聯梁君彥喺未當選立法會主席時會見傳媒，以及朱凱廸、梁繼昌、黃碧雲等議員即場加入質詢嘅情况，劉小麗都有直播，其中一條片已有逾1.7萬網民睇過。至於朱凱廸就有啲唔同，噚日中午喺3個議員未能成功宣誓，會議暫停時，阿廸就選擇好似記者即場報道咁，直播自己講解當時發生緊咩事、有咩爭議等。


至於建制派，民建聯嘅陳恒鑌（Ben）同葛珮帆亦有分別喺fb直播，喺主持會議嘅石禮謙宣布轉房開會後，阿Ben更行入去另一會議室開始直播，影足20分鐘，去到大部分民主派離場抗議時都仲直播緊。