回應畢業證書 柯創盛﹕委律師跟進

【明報專訊】民建聯今屆有4名新丁入立法會，其中喺九龍東贏出嘅柯創盛（Wilson），有無正規碩士學歷問題備受關注。Wilson噚日出席傳媒茶敘再被追問畢業證書一事，佢強調自傳媒報道後已經即刻聯絡學校，但學校要經唔同部門處理，所以仍然等緊回覆，預計唔到對方幾時覆。佢話已經委託律師幫手跟進，「有消息就通知大家」，又強調自己有學士同碩士證書，擺咗喺屋企，但喺校方回覆前唔會公開，因唔想向外發出錯誤信息。


噚日同場出席茶敘嘅，仲有民建聯主席李慧琼、張國鈞、劉國勳同周浩鼎。城鄉議題近期引起廣泛討論，身兼北區區議員嘅劉國勳話，希望可以擔當城鄉之間嘅「橋樑」；獨立議員朱凱廸以解決「官商鄉黑」問題為綱領，劉國勳無正面回應有無同對方交流，但就話相信大家有得傾。


阿鼎話鄭松泰似林峯

張國鈞透露自己主打教育同房屋議題，例如下星期就會動議討論中史科，身兼律師嘅佢亦打算利用法律背景，以法律角度向公眾解釋政策。周浩鼎話會主力跟進大嶼山發展同假難民等議題，佢噚日喺茶敘後仲向熱血公民鄭松泰大笠高帽，讚對方有禮貌之餘，形容對方似藝人林峯！阿鼎話佢同鄭松泰都有打招呼，相信日後溝通到喎。