游蕙禎想入8個事務委員會

【明報專訊】青年新政議員游蕙禎嘅「扑嘢論」全城熱議，佢喺噚日青政記者會上就堅持唔會迴避用詞，同場嘅梁頌恆都開口護花，話有時遣詞用語都同成長年代有關，反問同年輕人講嘢唔通要用「性行為空間不足」？又話「（講）扑嘢咪扑嘢囉」，唔覺得有咩問題或者好過火。


梁頌恆﹕講「扑嘢」唔過火

兩個新丁議員喺立法會開記招，其間亦談及未來4年議會工作。游蕙禎話佢同梁頌恆會分別加入8個同5個事務委員會，包括政制、發展、房屋同保安事務委員會等。對於泛民主派人士不滿「非建制」嘅稱呼而要「正名」為民主派，游不予置評，但會同泛民保持「友好關係」，按唔同議題加入泛民牽頭嘅結盟組織，又會同「較開明」嘅自由黨、「較親本土」嘅鄉事派溝通。


梁頌恆又話，未來一個月要完成黨內改組，希望發言人、召集人同議席嘅工作可以分開，亦想培育新梯隊接班。被問到會否喺議會提出「港獨」提案，佢話過去一年已證實《基本法》係「千瘡百孔」，要考慮點樣修正同改革，但就笑言喺立法會宣誓前「真係答唔到」。


兩議員今次搞記者會初時講明「不設提問環節」，後來先改番呢個「規矩」。游蕙禎解釋，記者會原定噚日晏晝1點半開始，之後兩人有其他行程，但經過考慮後，決定將記招提前1小時，亦取消埋行程，仲買埋茶點畀一眾行家。