田少毓民變議員助理 接收樹根人員 張國鈞團隊龐大

【明報專訊】立法會送舊迎新，今日正式復會，各議員都已埋好班，準備開工。Emily發現，有已退下火線嘅資深議員今屆華麗轉身，變成議員助理。例如自由黨鍾國斌（Felix）就有榮譽主席田北俊做佢超級議助。唔知要請得動田大少出馬，要開到咩天價呢？Felix就透露，對方其實係義務性質幫手。


「教主」黃毓民都會擔任鄭松泰「背後嘅男人」，以義務顧問形式擔任議助。據聞，民建聯葉國謙、譚耀宗都打算喺新丁議助名單裏面掛名。


其實唔少資深議員以往出入立法會自如，如今卸任後，進出都要登記，可能唔多習慣。而義務擔任議助就一舉兩得啦，既可有職員證方便出入，又可免費提供專業意見。


梁天琦黃台仰遙距做青政顧問

不過咁多個政黨中，青年新政班底可謂資歷最年輕。梁頌恆話，家立法會請咗4名全職議助，包括選舉時排名單第二嘅李東昇，佢哋全部都無處理議會嘅經驗，睇嚟大家都要從頭開始摸索。梁天琦同黃台仰就將會去英美等地進修，所以只會用「顧問」嘅身分協助青政嘅議會工作。


民建聯張國鈞嘅議助團隊可能最龐大，事關佢要接收埋鍾樹根同曾鈺成主席嘅議助，加埋地區議員辦事處人手，一共有15名員工咁多。連佢都笑言，覺得自己猶如開中小企咁，又因為不可虧待老員工，自己都要額外貼錢支付。