何君堯搞簽名運動「反語言暴力」

【明報專訊】早前喺街工區議員周偉雄facebook同網民對罵嘅立法會議員何君堯，噚日朝早出post話要推動簽名運動，「支持反對語言暴力運動」，佢先加自己個名，之後寫咗句「請接龍：」，據Emily觀察，post咗半日，留言中都有啲人應佢機，但亦不時見網民互罵。


何君堯喺post話，網上欺凌現象普遍，近年仲嚴重咗，話縱容網上暴行，「不單只威脅言論自由，更會助長現實暴力傾向」，決定發起簽名運動。有唔少網民話「支持」，但無響應呼籲接龍；有網民就留言「契弟叫人唔好講粗口」，亦有網民「苦口婆心」叫佢應該自己反省言行，最後搞到兩批網民不時互罵，Emily睇完都覺得唔係幾和諧。


事緣上周六街工區議員周偉雄用facebook直播葵盛東邨邨內事務，何君堯留言建議「叫（立法會議員）朱凱廸報警會有效啲」，演變成同網民罵戰。何君堯事後喺自己fb話今次係「勇敢地向語暴者說『不』」，又形容留言網民係「暴亂友」。