話游蕙禎長髮要監察 何秀蘭惹嬲嬲

【明報專訊】青年新政議員游蕙禎一星期前出席一個大學論壇，談到青年生存空間時，爆出一句「就算我哋要扑嘢（性交），我哋都搵唔到房去扑」，惹來社會熱論，撐嘅撐、鬧嘅鬧，講咗成個星期都仲未停，估唔到仲引伸到游蕙禎一把長髮，皆因工黨何秀蘭（Cyd）噚日喺facebook話，游議員嘅長髮更值得公眾監察。


阿Cyd噚日喺fb話，游蕙禎「扑嘢」論令公眾側目，形容俗語、粗鄙語隨住文化轉變成為新晉議員隨口而出嘅用語，只係集體選擇嘅結果。佢話游議員「更大的問題係一把長髮，須用大量食水保持整潔，如果沒有用天然物品造的洗髮護髮素，這些化學物品增加淨化污水所須電力，對環境的傷害，加速極端氣候變化，更值得公眾監察」。


此話一出，即時引起網民批評，個post幾個鐘內已有逾600人畀表情反應，當中逾半係畀「嬲嬲」。工黨秘書長譚駿賢對黨友嘅言論亦唔留手，喺fb話自己每朝必用定型水搞個頭，每日至少洗頭一次，夏天就多數兩次，仲會用護髮素，所以講到破壞環境呢，「何秀蘭 （Cyd Ho）請先斬我個頭落嚟以謝天下！」