區議員關注毒品飯堂 一句「叫朱凱廸報警」 何君堯網民對罵

【明報專訊】街工區議員周偉雄前晚透過facebook直播葵盛東邨邨內事務，講邨內懷疑有「毒品飯堂」，估唔到立法會議員何君堯去留言，講咗一句「叫朱凱廸報警會有效啲」。何律師呢個舉動引起網民反響，有網民直呼佢做「西環契仔」或「西環契弟」，何君堯不甘示弱，反擊叫網民做「契弟」，估唔到咁就引發咗一場罵戰。


互轟「西環契仔」「契弟」

Emily食住花生睇雙方留言，有網民批評何君堯「淨喺識得吹水同抽水，叫佢做嘢就龜縮」，亦有人指摘何「一個律師及立法會議員講啲咁嘅回應，未免……」亦有粗言穢語、叫佢食便便等。何就回應還擊，包括「妳腦裡除咗屎之外還有乜」等，仲上載一張截圖，內容係佢同周偉雄fb對話，交代點跟進件事。


好哋哋一單邨內事務變成咗網上罵戰，周偉雄都好勞氣，講本身想交代邨內疑有「毒品飯堂」，前晚開始搜尋可疑男子，但最終無功而回，話網上罵戰分散咗事件焦點，仲話兩三年前透過朋友認識何君堯，但雙方一直無接觸過，直到今次事件先第一次交談，亦不滿對方無通知下將部分雙方對話截圖上載fb，形容「唔受尊重」。


何君堯就話，作為新界西立法會議員，關心葵盛東邨事務，只不過以「半帶幽默」嘅形式去講，仲話之前朱凱廸報警，事情的確受到重視，所以佢句留言係「反映現時形勢」。至於點解同網民發生罵戰，佢就解釋係因為對方字眼，所以用番強硬方式回應，但「唔係粗言穢語」。


何入夜仲喺fb發文「勇敢地向語暴者說"不"」，話近年網上世界網民對異見人士包容空間小，而佢就喺討論區直接回應語暴友嘅評論，「以強硬姿態和他們交談，表明立場，直斥他們的不是，不折不扣地教訓他們，整整達三個多小時！」