記招故障甩漏 沈旭暉勞氣：溝通唔到

【明報專訊】中文大學香港亞太研究所國際事務研究中心同智庫Roundtable合作調查香港學生嘅國際視野，噚日召開記者會公布調查結果，原本邀請咗身在海外嘅中心聯席主任、學者沈旭暉，透過Skype介紹研究背景同目的。但記者會遲咗15分鐘開始，啱啱接通Skype，點知大會又出現技術問題，得畫面冇聲音，搞完一大輪之後，終於聽到沈大師把聲，點知第一句就係「我家同你哋溝通唔到」。


原來開記招間房冇裝Cam（鏡頭），沈大師透過Skype睇唔到記者會現場，似乎都唔知全場幾十人望實佢、聽緊佢講嘢。主持記者會嘅研究員陳偉信請佢介紹個研究，但沈大師經歷完延遲、技術問題後似乎有啲躁底，話「我完全唔知會場發生咩事，想我點介紹？」最後視像通話又斷咗。記者會開放畀中學通識科教師嚟聽，有教師話係因為沈旭暉先至嚟，家下冇得聽大師嘅睇法都有少少失望。陳偉信事後檢討話系統收得唔好，加上技術問題，話處理上有改善空間，佢都會再同沈大師溝通。