美圖秀秀出手機 盛惠3199元

【明報專訊】「美顏神器」美圖秀秀話咗來港上市，仲上晒初步招股文件，雖然公司未搞路演，但已率先搵旗下新推出嘅美圖手機，試下水溫。噚日召開美圖手機M6發布會，即日正式登陸香港，但就要盛惠3199蚊，價錢貴過小米等不少內地同胞產品，不過標榜個個女仔用來自拍都可以變索女，的確唔愁無市場。


標榜自拍功能 女神示範

M6發布會上仲邀請到三位女神周汶錡、周秀娜和吳千語，主持人都好識do，特登問吳千語係咪經常自拍同男朋友的甜蜜瞬間，點知千語BB就話自己鍾意拍屋企隻狗多啲。點解嘅？「因為狗比較可愛」。


3名女神又親身演示攞美圖手機自拍，由企係中間嘅吳千語持機，不過唔知太重定係唔好揸，最後都要娜姐出馬先影得靚靚。雖然美圖嘅管理層都有來，不過只限與三位女神自拍，其他問題一概不答，問佢最鍾意邊位女神，佢就笑笑口，乜都唔講。不過，小琴估可能係管理層初來甫到，仲未認清邊個係邊個啫。


[小琴密語]