經民聯撐的士業界 話尊重易志明

【明報專訊】政府近期拋出優質的士專營權方案，的士團體梗係好緊張權益會唔會受損，立法會航運交通界代表、自由黨易志明同的士業界聯繫緊密，但噚日經民聯就同業界召開「的士業捍衛權益大會」，仲話急業界所急。


林鍵鋒同Emily講，今次係的士團體主動搵黨友盧偉國商談，想經民聯了解業界睇法。林鍵鋒話自己以前其實做過交諮會主席、優質的士督導委員會主席，同的士團體代表都熟悉，所以都幫吓手一齊傾吓。林健鋒又話，佢哋雖然同易志明唔同政黨，但大家都係老朋友，梗係尊重易志明喇。


經民聯副主席林健鋒喺會上話，經民聯作為工商界代表，都希望向政府就「優質的士」專營權提出意見之前，先了解業界持份者睇法。林健鋒話，的士持牌人不論規模大小，都係「投牌」番嚟，用合法方法取得經營權，政府嘅新建議未能直接回應市民對於現有的士服務質素嘅關注，好似「黑的」兜路同濫收車資等，政府唔係單以推出「優質的士」，就可逃避執法責任喎。