鄺葆賢退出青政 「獨立不是不合作」

【明報專訊】積極部署派人出選立法會嘅傘後組織青年新政受到打擊，佢哋唯一嘅區議員，九龍城區議員鄺葆賢已經喺今個月3號退出青政。今次係年初青政發言人周世傑退出之後，青政再損失要員。本身係公院醫生嘅鄺葆賢噚日中午喺facebook發帖稱「Business as usual（如常工作）」，又標籤咗「#去向係會做真正嘅黃埔西居民 #兌現承諾#無受邀加入其他團體#亦無打算加入#無打算出選醫學界#獨立不是不合作」。


鄺葆賢去年同游蕙禎行孖必參選黃埔區兩個區會議席，結果鄺勝出，而落敗嘅游蕙禎就同鄺拍住工作，積極部署參選9月立法會，所以鄺退出青政，大家都關注事件對游蕙禎參選嘅影響。鄺喺fb留言話，「將來有合適議題或行動，我與青政仍會協商合作空間」。


青年新政就喺fb留言講，地區工作會繼續由青政同葆議辦合作，未會有變動。青政無解釋鄺退出嘅原因又或者雙方有咩分歧，只係話青年新政執委會於6月3號晚收到鄺張貼喺組織內部群組嘅退出信息，之後鄺已經自己更改區議會網頁嘅政治聯繫。青政兩星期以嚟內部有唔少人嘗試挽留，「惜未能成功，我們表示遺憾」。