跑馬地地底蓄洪池日內啟用

【明報專訊】唔講大家可能唔知，跑馬地馬場嘅地底喺過去兩年半以來，一直興建緊一個大型蓄洪池。渠務署總工程師陸偉雄話，蓄洪池配備智能系統，一旦遇上大暴雨，會因應跑馬地下游嘅水位，自動升降水閘，將收集到嘅雨水流入蓄洪池蓄起，成個地下瀑布咁款㗎。


收埋嘅雨水會喺適當時先放番出嚟，排出維港，可大大紓緩跑馬地同灣仔一帶，包括馬場本身嘅水浸風險。


蓄洪池第一期工程已經完成，容量達3萬立方米，相等於12個標準游泳池，可以抵禦20年一遇嘅暴雨，預計日內啟用。第二期工程預計會喺2018年雨季前完成，總容量會增至6萬立方米，可抵禦50年一遇嘅暴雨。


儲雨水紓水浸 如地下瀑布

整個工程預算為10.7億元。另外，渠務署長鍾錦華話，署方今年再剔除咗屯門新村嘅水浸黑點，令現時嘅水浸黑點得番10個，會繼續改善工程。