梁太唐媽媽同台

【明報專訊】三八婦女節都過咗一段時間，但噚日就有婦協嘅三八國際婦女節酒會，出席嘅女嘉賓個個分量十足，包括特首梁振英嘅太太唐青儀（左），佢噚日就主打綠色，周圍同其他婦女傾偈。


酒會上，梁太巧遇唐英年媽媽唐尤淑圻（右）。原來兩個人都係台上嘉賓，梁太坐正台中間，儀式完結，梁太由左至右祝酒，但梁太祝祝吓酒，去到唐媽媽前兩三個位就停咗，唔知係有心定無意？難為唐媽媽背後嘅婦協主席林貝聿嘉，夾喺中間。