財爺「開槍」射大嚿？

【明報專訊】特首梁振英（CY）噚日出席答問大會後離開立法會時，繼續被人民力量陳偉業（大嚿）、陳志全，同社民連梁國雄狙擊，大嚿大罵CY「無良特首」。跟隨CY離開嘅財政司長曾俊華見到大嚿，即邊笑邊向大嚿做出開槍手勢，連環開咗至少「6槍」。


同僚不理大嚿 曾俊華開「6槍」

大嚿、長毛等人趁CY乘扶手電梯離開立法會時，追罵佢「無良特首」、「弱智特首」，CY充耳不聞，頭都無回離開立法會。尾隨嘅官員一齊保持隊形，無望向大嚿等人，唯獨財爺突然發揮鬼馬本色，笑笑口向大嚿、長毛「連環開槍」。


唔知財爺「開槍」係咪代CY反擊呢？不過，大嚿就不以為然，淨係叫財爺教吓CY點答問題同睇行政會議嘅文件。