叫政府勿走數 思匯做丁屋政策研究

【明報專訊】由副環境局長陸恭蕙創辦嘅智庫思匯政策研究所噚日同傳媒茶敘，預告2015年會推出嘅研究報告，其中一項係連政府都唔敢搞嘅丁屋政策。思匯行政總監葉溵溵（溵粵音讀「殷」）話，研究以電話訪問1200名市民，當中600人係丁屋居民，希望透過民調反映新界人自己點樣睇呢項政策，會將結果交畀政府參考，最快4月做到。


葉溵溵話思匯先後喺2003及2013年發表丁屋研究報告，指出丁屋現存問題，但政府至今完全無反應，佢記得2012年向3名特首候選人問過丁屋問題，大家講到天花龍鳳，但現屆政府完全無做過嘢，希望特首唔好走數。講開丁屋，Emily提起陸恭蕙喺1990年代到新界鄉議局，為新界女原居民爭取土地繼承權，惹來原居民不滿，有人更揚言「強姦陸恭蕙」，葉溵溵話件事對佢無影響，又話兩年前獲邀出席鄉議局會議，無受到唔禮貌對待。