加德士工程部 首聘女將加盟

【明報專訊】近年工程界已經唔係男士嘅世界，全港擁有39個油站嘅加德士，半年前亦招聘咗一個科大化學工程系嘅畢業生，成為該公司工程部64名員工之中，唯一嘅女將。


陳艷莉（Michelle ）係馬來西亞人，小時候隨家人來港生活，中學發現自己對化學有興趣，結果就走上咗呢條汗水之路。科大選修化學工程嘅Michelle，去年畢業後，發現加德士請人，佢就諗起小時候，父母喺馬來西亞駕車，到加德士入油嘅情景，於是應徵，仲順利成為維修及營造工程師，負責全港加德士油站嘅維修保養。


佢在場無人講粗口

工程部只得一個女工程師，Michelle話入職時無諗過男女比例問題，入職後發現上司以至地盤工人對佢都好客氣，佢在場嘅時候唔會有人講粗口。Michelle話，佢入職時遇正加德士翻新大圍一個油站，令佢有機會跟進油站由一片爛地直至完工，好有滿足感，佢又同Emily介紹隱藏喺地底嘅新設計，就係以雙層物料製造嘅地下燃料缸，以防止燃料缸一旦爆裂滲漏，污染土地，較法例要求更高。