復星擬歐洲「掃名牌」

【明報專訊】內地富豪錢多，兼且好肯使，全球名牌、古董珍品價格都被買起。家買歐洲名牌唔單止係個人，近年亦有好多內地民企買歐洲名牌公司。上海知名民企復星國際（0656），上個月已用2500萬歐元（約2.53億港元）入股法國旅遊度假村地中海俱樂部7.1％權益。未來復星有意加碼，再到歐洲「掃名牌」，入股一啲名牌公司，對象係服裝及紅酒公司。

想幫歐服裝紅酒商打入中國

彭博通訊社噚日訪問負責投資嘅復星國際母公司復星集團高層錢建農。錢建農話﹕「好多歐洲公司已經接觸我哋，大家正在洽談。」

佢又話，復星正喺法國、意大利、德國、西班牙、希臘，搵緊一啲知名嘅品牌服裝及紅酒生產商合作。「我哋會幫合作伙伴喺中國開分店、向佢地提供關於管理及員工文化嘅建議，仲有分店嘅選址。」錢建農未有透露具體嘅入股對象，因為洽商仲未落成。

復星之前入股地中海俱樂部，雙方已有意向，合作喺中國發展高級度假村。