大輝﹕君子小人睇法不一

【明報專訊】被指為「唐英年家臣」嘅立法會工業界議員林大輝（圖），向來言行出位，繼早前話梁振英（CY）再唔交代僭建，就連佢精心炮製嘅《施政報告》都冇人理後，大輝噚日再拋下金句，妙論CY嘅誠信問題。


大輝噚日被問到會唔會支持向CY提不信任動議時，話目前言之尚早，因為每日傳媒都有新資料，覺得要睇定啲先決定咁話。咁CY又有冇誠信問題先？大輝即刻氣定神閒話﹕「一個君子同一個小人，同一個賊同慈善家對誠信嘅睇法都唔一樣，好難判斷CY係咪有誠信問題」。唔少行家聽到呢句都笑咗出嚟，唔知大輝口中嘅「君子」同「小人」係指邊個呢？


金句王又點止大輝一個，民主黨劉慧卿噚晚喺辯論免費電視牌照時，亦以金句揶揄亞視。佢同立法會主席曾鈺成講﹕「主席，你成日去嗰個《把酒當歌》，一日重播4次，你應該好開心，但係呢個節目零收視，不如你自己同自己講吓嘢仲好呀！」之後卿姐又話亞視炒人係學中央政策組等，搞到曾鈺成唔知好嬲定好笑。