施政財案地區諮詢撲飛難

【明報專訊】特首梁振英同財政司長曾俊華正就明年初出爐嘅《施政報告》同《財政預算案》做諮詢，除咗會見政黨，政府噚日出稿，話將喺下月先後去港、九、新界舉行3場地區諮詢會，特首同財爺都會出席，蒐集公眾意見。


港九新界各開一場

第一場將喺九龍區，下月3日傍晚喺九龍灣展貿中心舉行。跟住係下月11號喺柴灣青年廣場，最後就係新界區，下月13日傍晚於葵青劇院舉行。


除咗各區議會嘅地區人士，市民想出席嘅話，可以致電81088632報名，先到先得。不過，唔知係咪有團體好熱心搶門票，雖然政府揀嘅諮詢場地唔係細，但政府噚日11點出新聞通告，短短幾個鐘，到咗下午，新界嘅一場已經爆滿，市民想去都無辦法。


新界諮詢半日爆滿

政府咁多文娛場地，要搵地方做公眾諮詢會應該唔難，但據Emily所知，政府評估到時一定有示威者踩場，所以搵地方時，要考慮就算示威者堵塞，都唔會對交通及秩序構成干擾，所以先揀咗呢3個場地。