李卓人跌落約旦河「受浸」

【明報專訊】模玩濕身，唔通連走實力路線嘅工黨主席李卓人都玩埋一份？阿人上星期去約旦開國際職工會聯盟（International Trade Union Council）嘅全球執委會，經過約旦河時，本來只係打算捲起褲腳試吓落水，點知條河好深，佢第一步就直插水中，成身濕晒，喺呢條耶穌領洗嘅河意外「受浸」。

感約旦以色列關係緊張

阿人話，今次短短幾日約旦之行，感受到約旦同以色列兩國關係好緊張。佢話，約旦河其實只係十幾米闊，喺河嘅一邊，可以清楚見到對面嘅以色列人，但導遊就千叮萬囑，叫佢哋唔好向對面群眾揮手，否則後果自負。阿人講笑咁講話要過河，領隊即刻警告佢，過河嘅話，以色列軍會即刻開槍打死佢，認真得人驚。