Miss Mo 英文考起翻譯

【明報專訊】公民黨毛孟靜（Miss Mo）素來以英文好見稱，上周五佢喺立法會衛生事務委員會以英語發言。佢當日喺發言起首用嘅「pope-catholic」呢個詞，考起咗立法會嘅翻譯。


pope-catholic：阿媽係女人

Miss Mo話，當日佢發言之後，秘書處職員即刻走過去問佢攞發言稿，以免搞錯佢嘅用字。其後，佢哋喺「pope-catholic」後打一個問號，再傳真呢份稿畀Miss Mo，問佢到底點解。Miss Mo解釋，「pope-catholic」意思係「教宗係天主教徒」，亦即係講都多餘，有啲似俗語嘅「阿媽係女人」囉。


新民黨議員田北辰上周四喺特首答問大會話開會可以用英語，話係要提升港人英語水平，似乎Miss Mo對此都有同感，計劃喺立法會提出動議，建議每月訂一個「英語日」，規定議員喺大會上一定要用英語發言。


佢話，家唔少學生做通識科功課都要聽立法會會議，相信咁樣可以令學生多啲接觸英文喎。Emily就話，「英語日」一定考起唔少議員，單係要梁國雄上周喺答問大會嘅名句「你鹵味唔食，食叉燒」，如果改用英語表達，真係唔簡單喇。