港鐵競步踩場社民連學乖

【明報專訊】港鐵競步賽噚日喺中環舉行，正值政府檢討港鐵可加可減機制，有團體踩場抗議，話港鐵年年加價係吸血鬼，當中包括社民連成員。上年社民連都有抗議，仲有成員衝上台，搶咗當時運房局長鄭汝樺支咪，被控擾亂秩序行為罪成，兩名被告家仲上訴緊。噚日社民連就學乖咗，只係喺賽事期間走入賽道叫吓口號（圖a），經工作人員勸喻後佢哋都走番出嚟，未有阻住人哋比賽。


呢個賽事有1500人參加，分開多個組別，包括有40幾個政商名人參加嘅「港鐵主席邀請賽」，參賽者包括運房局副局長邱誠武（圖b右起）、立法會議員謝偉俊及馮檢基、行會成員張震遠、醫生周伯展、港鐵主席錢果豐、貿發局主席蘇澤光、醫管局主席胡定旭等。結果會計師公會前會長蔡永忠奪男子組冠軍，東華醫院行政總監余詩思醫生就攞女子組冠軍。


（尹錦恩攝）