低調黃碧雲埋首推議案

【明報專訊】立法會復會兩周，唔少搶鏡新星相繼彈出，最矚目嘅莫過於係發言激昂、七情上面嘅民建聯蔣麗芸。相對之下，同樣來自九西嘅民主黨黃碧雲就相對低調，見報率冇蔣麗芸同連番被狙擊嘅梁美芬咁勁。黃碧雲笑言，蔣麗芸嗰啲係負面宣傳，寧願無好過，目前希望集中精力做好規管美容業呢個議題。


針對DR集團嘅醫療事故，黃碧雲會喺下周三立法會大會提出規管美容業議案，近日積極約見業界團體。面對呢個制度畸形、連「捍衛新聞自由」議案都畀人否決嘅立法會，黃碧雲話，佢提出嘅議案政治味唔濃，爭議亦較少，希望可以成為今屆立法會第一項順利通過嘅議案。


未諗選民主黨主席

外界一直估計，黃碧雲或者佢嘅黨友胡志偉會接任民主黨主席，但黃碧雲就話，自己比志偉更「新」，因連區議員都未做過，未來一段時間，想集中精力做好地區同議會嘅工作，特別係加強民主黨喺九西嘅地區網絡，選主席之事，都係睇吓點先。