工盟猛鬼團訪灣仔尋「吸血鬼」

【明報專訊】香港人近年對西方「哈囉喂」（Halloween）好投入，喺10月底扮鬼扮馬搞搞氣氛。不過，Emily 前幾日發現，職工盟趁住呢個西方鬼節搞氣氛，搞咗一個灣仔「猛鬼團」深入鬼地，去完星街冤魂防空洞，再去船街鬼屋、和昌大押，夜麻麻成班人一齊去尋幽探秘。


呢個「猛鬼團」嘅正名係「猛鬼保育社區導賞團」，透過港人感興趣嘅鬼故題材入門，讓參與者了解每個地方背後嘅文化同保育意義。帶團嘅麥德正，除咗係社運人士，仲係灣仔住咗幾十年嘅老街坊，佢話導賞團會帶市民認識舊灣仔，聽流傳已久嘅鬼故，仲有近期關於地產商收地所發生嘅怪事，見識地產霸權下的「吸血鬼」咁話。


導賞團農曆7月已搞過，反應熱烈，再加場，喺下月20號晚上8 點。麥德正話，如果喺正日搞一定好多人去，無晒氣氛，而且應節多過保育，個團就無咗意義。