民主黨新民盟 區會補選再開火

【明報專訊】相嗌唔好口，民主黨同新民主同盟再就沙田區議會鞍泰區補選一事駁火。事緣Emily日前訪問民主黨蔡耀昌（九哥），佢話該黨曾與新民盟有過非正式協調，但協調不成。新民盟噚日就發聲明，強調該黨從未同佢協調，對此「震驚和憤怒」。


新民盟嘅聲明仲質疑九哥作為「泛民主派區選協調機制」嘅負責人，「揑造事實，令人質疑其誠信及角色衝突」。該黨召集人范國威話，任何黨員「從來都冇」同民主黨黨員就呢件事交流，「呢件事事關重大，唔會私底下講」。


新民盟：從沒協調 感震驚憤怒

Emily澄清，當日打電話訪問九哥時，佢的確係以民主黨成員身分回應，而非協調機制負責人，如果惹嚟誤會真係唔好意思。不過，九哥話今次係由一名資深黨友出面，喺社交場合，同新民盟嘅朋友摸底傾補選，「但如果對方要捉字虱，話係同『我』冇協調，或定義咩係協調，我都冇嘢講」。九哥表明完全不能接受新民盟嘅指控，要求對方收回。


民主黨：非正式協調 新民盟捉字虱

Emily找尋真相，噚日搵到當日負責出面同新民盟溝通嘅民主黨資深沙田區議員。佢承認當日同新民盟成員嘅對話唔算係「正式協調」，對方可能亦無「上報」，「我同新民盟交流過，得悉佢哋已決定出選，都知冇得傾」。對於范國威話全黨上下「從來都冇」同民主黨傾過，又發表聲明，該名成員就覺得范國威講大咗，仲爆佢當日都喺現場，「可能半隻耳聽到」。到底邊個啱邊個錯，Emily無從判斷，但見到泛民又再互鬥，肯定親者痛仇者快。